GC FUND

ზოგადი ინფორმაცია სტაჟირების პროგრამის შესახებ:

სტაჟირების პროგრამა ფინანსების დარგში საქართველოს თანაინვესტირების ფონდის ახალი პროექტია, რომელიც იმ ახალგაზრდებისთვისაა განკუთვნილი, რომლებსაც სურთ მიიღონ პროფესიული გამოცდილება და გაეცნონ იმ სექტორების მნიშვნელოვან ასპექტებს, რომლებიც წარმოდგენილია ფონდის საინვესტიციო პორტფელში.

პროგრამის ფარგლებში, თითოეულ მონაწილეს საშუალება ექნება სტაჟირების პროგრამა დაიწყოს საქართველოს თანაინვესტირების ფონდის ბიზნეს ანალიტიკის დეპარტამენტში. პროგრამის პირველი ეტაპის დასრულების შემდგომ მონაწილეებს საშუალება ექნებათ განაგრძონ სტაჟირება ფონდის 10 სხვადასხვა შვილობილ კომპანიასა და დეპარტამენტში, რაც სრულად მოიცავს ისეთ სექტორებს, როგორებიცაა: სოფლის მეურნეობა და ლოჯისტიკა, ენერგეტიკა, უძრავი ქონება და სასტუმრო ინდუსტრია. სტაჟირების პროგრამის ფარგლებში გაწერილი თითოეული დავალება დამყარებულია რეალურ პროექტებზე, არსებულ გამოწვევებსა და საჭიროებებზე. ანაზღაურებადი სტაჟირების პროგრამის ხანგრძლივობაა 6 თვე.

საქართველოს თანაინვეტირების ფონდის პროგრამის საშუალებით მიზნად ვისახავთ, მოვიზიდოთ საუკეთესო სტუდენტები მთელი საქართველოს მასშტაბით და მათი კარიერული წინსვლის საწყის ეტაპზე ხელი შევუწყოთ მათ პროფესიულ ზრდასა და განვითარებას. 

საქართველოს თანაინვესტირების ფონდი - ბიზნეს ანალიტიკის დეპარტამენტი

სტაჟირების პროგრამის პირველი ეტაპი გულისხმობს 12 კვირიან პროგრამას საქართველოს თანაინვესტირების ფონდის ბიზნეს ანალიტიკის დეპარტამენტში, რაც მოიცავს ფინანსური მოდელირების სრულ კურსს, POWER BI-ს პროგრამის შესწავლასა და გამოყენებას, კვლევის პროცესის მართვას, საოპერაციო პროგრამების განხილვას. თითოეული საკითხის შემაჯამებელი პრეზენტაცია განხილული იქნება საქართველოს თანაინვესტირების ფონდის საინვესტიციო საბჭოს წევრებთან. პროგრამის პირველ ეტაპზე მიღებული ცოდნისა და გამოცდილების გათვალისწინებით მონაწილეები გადაინაცვლებენ პროგრამის შემდეგ ეტაპზე, კერძოდ, ფონდის 10 შვილობილ კომპანიასა და დეპარტამენტში.

სოფლის მეურნეობა და ლოჯისტიკა

სოფლის მეურნეობის და ლოჯისტიკის სექტორი, საქართველოს თანაინვესტირების ფონდის ერთერთი სტრატეგიული მიმართულებაა. სტაჟირების პროგრამა ითვალისწინებს 3 კვირიან პროგრამას აღნიშნულ სექტორში ოპერირებად კომპანიებში, კერძოდ: საქართველოს სათბურის კორპორაციასა და აგრო სახლში. პროგრამის მეორე ფაზაში, მონაწილეები განიხილავენ საოპერაციო პროცესებს, ERP სისტემებს და მის გამოყენებას, ბიუჯეტირებას, აღრიცხვიანობის სისტემას, ფინანსურ მოდელირებასა და მენეჯმენტს.

ენერგეტიკა

საქართველო ჰიდრო-ელექტრო ენერგიის გენერაციის თვალსაზრისით ერთერთი ყველაზე პერსპექტიული ქვეყანაა ევროპაში, რაც ინვესტორებისთვის მრავალ შესაძლებლობას ქმნის. სწორედ ამიტომ, საქართველოს თანაინვესტირების ფონდისთვის ენერგეტიკის სექტორი ერთ-ერთი პრიორიტეტული მიმართულებაა. სტაჟირების პროგრამის ფარგლებში, მონაწილეები გაივლიან 2 კვირიან პროგრამას მტკვარი ჰესის პროექტში, სადაც განიხილავენ საოპერაციო და აუდიტის პროცესებს, ფინანსურ მოდელირებას და რეალურ ქეისებზე დაყრდნობით წარმართავენ სამუშაო პროცესებს.

ტურიზმი და უძრავი ქონება

ტურიზმი და უძრავი ქონება ერთ-ერთი ყველაზე სწრაფად განვითარებადი სექტორებია საქართველოში. სწორედ ამ სექტორში პროგრამის მონაწილეები 6 კვირის მანძილზე მიიღებენ გამოცდილებას სხვადასხვა კომპანიაში. უძრავი ქონების მიმართულებით საქართველოს თანაინვესტირების ფონდი ორი მსხვილი პროექტით არის წარმოდგენილი: გალერია თბილისი და აქსის თაუერსი. სწორედ ამ ორ პროექტში გააგრძელებენ მონაწილეები სტაჟირების პროგრამას და განიხილავენ საოპერაციო პროცესებს, ფინანსურ მოდელირებასა და აღრიცხვიანობის სისტემას. საქართველოს ტურიზმის განვითარების ფონდის პროექტების მეშვეობით მონაწილეები გაეცნობიან მშენებლობის დეველოპმენტის სხვადახვა ეტაპს, ხოლო სასტუმროების მართვის კომპანიის ფარგლებში, რომელიც ოპერირებას უწევს პარაგრაფის ბრენდის სასტუმროებს, განიხილავენ საოპერაციო პროცესებს, ბიუჯეტირებას და აღრიცხვიანობას.

საქართველოს თანაინვესტირების ფონდი

სტაჟირების პროგრამის დასკვნითი ნაწილი კვლავ საქართველოს თანაინვესტირების ფონდში წარიმართება, სადაც მონაწილეები ალტერნატიული პროექტების, უძრავი ქონების და ფინანსების და რისკების დეპარტამენტებში, დეტალურად შეისწავლიან სხვადასხვა პროექტის მნიშვნელოვან ასპექტებს. სტაჟირების პროგრამის დასკვნით ფაზაში, რომელიც გაგრძელდება სამი კვირა, მონაწილეებს საშუალება ექნებათ მიღებული ცოდნა და გამოცდილება გამოიყენონ რეალურ ქეისებზე მუშაობისას, რაც მოიაზრებს არსებული ოპერირებადი პროექტის გაყიდვის ან რეფინანსირების შემთხვევის ანალიზს, ფინანსურ მოდელირებას და პრეზენტაციას საინვესტიციო საბჭოსთან.

დაინტერესების შემთხვევაში გთხოვთ, თქვენი რეზიუმი გამოაგზავნოთ ელ ფოსტაზე: [email protected] +995 32 2 47 00 03